الاخ ابو عبيدة .. الف شكر للرد .. وانت راجل محترم وانت بردو اللي كنت دايما ترد عليا من سنة تقريبا
بس اسمحلي كلامك فيه بعض الملاحيظ...
اولا انت بتقول ان اللي بيتبعوا الديانات الاخرى بيتبعوها بالاهواء والشهوات .. ودة كلام غير صحيح .. انا اعرف مسيحيين .. مقتنعين ان دينهم هو الحق .. مش لمجرد شهوة او هوى
فمثلا .. اي شهوة واي هوى في المسيحية ؟؟؟ .. عندهم الجواز مرة واحدة وبدون طلاق .. عندهم صيام اشد من صيام المسلمين من وجهة نظري .. عندهم اديرة العيشة فيها صعبة جدا .. عندهم راهبين وراهبات واهبين حياتهم للدين وسايبين الشهوة خالص ...
يا سيدي الفاضل .. لو قلنا ان كل اتباع الديانات الاخرى اتباع هوى وشهوات .. نبقى بنهزر
انا شايف اقتناعي او اقتناعك بالاسلام مفيش اي فرق بينه وبين اقتناع مسيحي بالمسيحية
وحضرتك بتقول الحق واحد .. ماشي واحد لكن مع مين .. انت بتقول الحق معاك وهما بردو بيقولو الحق معاهم !!!
حاول تخرج نفسك برة الدايرة عشان تفهم الموضوع .. تخيل نفسك واحد جاي من المريخ .. وشايف كل دين بيقول انه هو الحق...
ولو اتهمت مسيحي بالغباء .. فهو بيتهمك بالغباء بردو .. ولو اتهمتو بالشهوانية .. هيقولك انتو بتتجوزوا اربعة .. يعني من زاوية محايدة الكفة متعادلة ..
لكن انت بتتكلم من وجهة نظر مسلم مولود مسلم .. مش من وجهة نظر انسان ...
السؤال مش في مين الدين الصح ومين الغلط .. السؤال عن الانسان اللي اقتنع بالغلط .. مش عن عمد او هوى او شهوة او كبر .. لكن اقتنع تمام الاقتناع .. وعبد ربنا بالطريق الغلط دة .. تمام زي المسيحيين اللي انا اعرفهم .. كيف يعذب في النار عذاب ابدي؟؟؟
بالنسبة للاخ فاروق ...
شكرا لردك .. بس حضرتك بتجاوب على سؤال تاني خالص .. حضرتك مش فاهم سؤالي ... حاول تفهم قصدي ..
اسف للاطالة .. والسلام
|